Աշխարհը մտել է արագընթաց տեխնոլոգիական վերափոխման շրջան։ Արհեստական բանականությունը (ԱԲ), քվանտային հաշվարկները, կենսատեխնոլոգիաներն ու թվային կառավարումը վերափոխում են պետությունների կառավարման մոդելները, տնտեսության կառուցվածքն ու հասարակական հարաբերությունները։
Ազգային միացյալ Հայաստանը հավատում է, որ այս դարաշրջանի հիմնական մարտահրավերն ու հնարավորությունը միաժամանակ ազգային ինքնիշխանության պահպանությունն է և տեխնոլոգիական առաջընթացի լիարժեք յուրացումը։
Մենք պետք է կառուցենք նորարար Հայաստան, որը ոչ թե տեխնոլոգիական զարգացումների սպառող է, այլ դրանց ստեղծող և արտահանող։
---Մեր ռազմավարական նպատակները
1. Պետական նորարարական քաղաքականություն
- հաստատել ազգային ռազմավարություն՝ ուղղված ԱԲ-ի, թվային կառավարման և բարձր տեխնոլոգիաների զարգացմանը՝ որպես պետական գերակա ուղղություն,
- ձևավորել Ազգային տեխնոլոգիական խորհուրդ, որը կհամադրի պետական, ակադեմիական և մասնավոր սեկտորների ջանքերը։
2. Գիտահեն տնտեսություն և տեխնո-անկախություն
- ներդրումներ կատարել գիտահետազոտական և փորձարարական աշխատանքներում՝ խթանելով հայաստանցի գիտնականների, ինժեներների և ծրագրավորողների ներուժը,
- զարգացնել հայկական տեխնոլոգիական արտադրանքների արտահանումը, հատկապես՝ ԱԲ լուծումների, կիբերանվտանգության և թվային կառավարման ոլորտներում։
3. Կրթություն՝ ապագայի հմտությունների համար
- թվային գրագիտությունը և արհեստական բանականության հիմունքները դարձնել հանրակրթության ու բուհական ծրագրերի անբաժան մաս,
- կազմել և իրականացնել վերապատրաստման և վերաորակավորման ազգային ծրագիր՝ աջակցելով աշխատաշուկայի համապատասխանեցմանը տեխնոլոգիական փոփոխություններին։
4. Նորարարական միջավայր և ձեռնարկատիրություն
- ստեղծել նորարարական էկոհամակարգ՝ պետական աջակցության, հարկային արտոնությունների և վենչուրային ներդրումների միջոցով,
- նվազեցնել բյուրոկրատիան՝ տեխնոլոգիական ստարտափների գրանցման, արտոնագրերի և արտահանման գործընթացներում։
5. Արհեստական բանականության էթիկա և ազգային անվտանգություն
- մշակել ազգային էթիկական կանոնագիրք ԱԲ-ի կիրառման համար, որը կապահովի մարդու իրավունքների, տվյալների պաշտպանության և հանրային վստահության պահպանումը,
- ապահովել, որ ԱԲ-ն ծառայեցվի ազգային անվտանգությանը, պետական կառավարման արդյունավետությանը և հանրային բարեկեցությանը, այլ ոչ թե արտաքին ազդեցությունների։
6. ԱԲ-ն հանրային ծառայություններում
- ներդնել ԱԲ և թվային լուծումներ՝ առողջապահության, տրանսպորտի, կրթության և սոցիալական ոլորտներում՝ ծառայությունները դարձնելով արագ, թափանցիկ և մատչելի,
- զարգացնել խելացի քաղաքների հայաստանյան մոդելը՝ տեղային ինքնակառավարման նոր ձևաչափերով։
Մեր տեսլականը
Արհեստական բանականությունն ու նորարարությունը պետք է դառնան ազգային վերածննդի գործիք, ոչ թե սպառնալիք։
Մենք կառուցում ենք խելացի, արդար և ստեղծագործ Հայաստան, որը ոչ թե սպասում է ապագային, այլ ձևավորում է այն՝ սեփական արժեքների ու պետական շահերի հիման վրա։